डॉ. भाऊ दाजी लाड संग्रहालय

सदर प्रदर्शन अन्नु पालाकुन्नथु मॅथ्यु यांच्या गेल्या तीन दशकांतील आठ महत्वपूर्ण कलाकृती प्रस्तुत करतं. उकल सवड मागते (मायनर मॅटर्स / सिपिया आय, २०२२) हे मॅथ्यु यांच्या आजवरच्या कलानिर्मितीचा आढावा आपल्यापुढं प्रस्तुत करतं. ते त्यांच्या कलाकृती आणि कलाप्रवास अनुभवण्याची संधी बहाल करतं. छायाचित्रण, कोलाज, ॲनिमेशन आणि व्यंगचित्रणाच्या वापरातून आकाराला आलेल्या कलाकाराच्या वैचारिक बैठकीचं वृत्त मांडताना, सदर प्रदर्शन सांस्कृतिक ओळखीचा माग, त्याला दिलेलं सादरीकरणाचं कोंदण, आणि त्याच्याशी जोडलेले तरल पदर उलगडू पाहतं. ओळख सांगताना व अनुभवताना स्वत:ला आणि इतरांना आलेल्या अनुभवांच्या गोष्टी मॅथ्यु सांगतात. जरी त्यांनी आपल्या कारकीर्दची सुरुवात एक सिद्धहस्त स्थिरचित्रं टिपणाऱ्या छायाचित्रकार म्हणून केली असली, तरी त्यांनी आपल्या कलासाधनेच्या कक्षा विस्तारत, स्थिर प्रतिमा, चलचित्रं आणि ध्वनी यांचा अनोखा समन्वय साधत, रसिकांसाठी एक अनोखा अनुभव गुंफिला. त्यांच्या कलाकृती अनेकदा गतकालीन छायांचित्रांच्या संग्रहांवर बेतलेल्या दिसतात, त्या त्यांवरुन प्रेरणा घेतात, आणि ऐतिहासिक कथानकांचा आणि वसाहतवादाच्या वेढ्याचा पुनर्वेध घेतात.